കിഴക്കൻ-മദ്ധ്യ ആഫ്രിക്കയുടെ മഹാതടാക പ്രദേശത്ത് സമുദ്രാതിർത്തി ഇല്ലാത്ത ഒരു ചെറിയ രാജ്യമാണ് റുവാണ്ട.ആഫ്രിക്കൻ ഭൂഖണ്ഡത്തിൽ ഏറ്റവും കൂടുതൽ ജനസാന്ദ്രത ഉള്ള രാജ്യമാണിത്. സുദീർഘമായ സംഘട്ടനങ്ങളുടെയും രക്തച്ചൊരിച്ചിലിന്റെയും തുടർച്ചയായ കൂട്ട നരഹത്യയുടെയും ചരിത്രമാണ് റുവാണ്ടയ്ക്ക് ഉള്ളത്.
1970കളിലെ റുവാണ്ടയാണ് സിനിമയുടെ കഥാപരിസരം. ഒരു കത്തോലിക്ക പള്ളിയുടെ കീഴിലുള്ള ബോർഡിംഗ് സ്കൂളിൽ പഠിക്കുന്ന ഏതാനും ചില പെൺകുട്ടികൾ തമ്മിലുള്ള ഉള്ള ആഭ്യന്തര കലഹങ്ങളിലൂടെയും പിന്നീട് ടുട്സി, ഹുട്ടു ഗോത്രങ്ങൾ തമ്മിലുള്ള വംശീയ കലാപത്തിലൂടെയുമാണ് കഥ നീങ്ങുന്നത് . തദ്ദേശീയ സംസ്കാരത്തെ അടിച്ചമർത്തൽ, സ്വത്വപ്രതിസന്ധി, വിവാഹത്തിനു മുൻപുള്ള ലൈംഗികതയിലും ഗർഭത്തിലും പള്ളി കൈക്കൊള്ളുന്ന നിലപാടുകൾ തുടങ്ങിയ വിഷയങ്ങളുടെ സാന്നിധ്യവും സിനിമയിലുണ്ട്.
സിനിമയെ നിരവധി അധ്യായങ്ങളായി തിരിച്ചിരിക്കുന്നു. ഓരോ അധ്യായത്തിലും വ്യത്യസ്തമായ ഒരു കഥാപാത്രത്തെ കേന്ദ്രീകരിച്ച് കഥ മുന്നോട്ട് പോകുന്നു. സ്കൂളിൽ, പെൺകുട്ടികൾക്ക് രാജ്യത്തെ ഉന്നതരാകാൻ പരിശീലനം നൽകുന്നു. വിവിധ സാമൂഹിക പശ്ചാത്തലങ്ങളിൽ നിന്നുള്ളവരാണെങ്കിലും, അവർ ഒത്തിരി സന്തോഷവതികളായി കാണപ്പെടുന്നു.. അവർ പരസ്പരം ഊഷ്മളമായ ബന്ധം ആസ്വദിക്കുന്നു.യൂറോപ്യൻ - ഫ്രഞ്ച് ജീവിത രീതിയും മതവും പിന്തുടരാൻ വിദ്യാർത്ഥികൾ നിർബന്ധിതരാകുന്നു. ഫ്രഞ്ച് സംസാരിക്കാൻ അവരെ പ്രോത്സാഹിപ്പിക്കുകയും പലപ്പോഴും അവരുടെ മാതൃഭാഷ ഒഴിവാക്കാൻ ഉപദേശിക്കുകയും ചെയ്യുന്നു. ഒരു പക്ഷേ, അധ്യാപക-വിദ്യാർത്ഥി ബന്ധം കുറച്ചു കൂടി ലളിതമാക്കാനായിരിയ്ക്കാം.
കോളനിവത്കരിക്കപ്പെട്ടവരുടെ യൂറോപ്യൻ ആരാധന മാനസികാവസ്ഥ ചിത്രീകരിക്കപ്പെടുന്ന നിരവധി ഉദാഹരണങ്ങളുമുണ്ട്.
ഒരു ഉന്നത സൈനിക ഉദ്യോഗസ്ഥന്റെ മകളായ ഗ്ലോറിയോസയ്ക്ക് അവളുടെ ആരാധന രീതികൾക്ക് വിരുധമായ സവിശേഷതകളുള്ള കന്യകാമറിയത്തിന്റെ പ്രതിമയോട് വളരെ അതൃപ്തിയുണ്ട്. പ്രതിമ പരിഷ്കരിക്കാനുള്ള അവളുടെ ശ്രമങ്ങൾ പാളിപ്പോവുകയും അവൾക്ക് പരിക്കേൽക്കുകയും പ്രതിമയ്ക്ക് കേടുപാടുകൾ സംഭവിക്കുകയും ചെയ്യുന്നു.സംഭവം മറച്ചു വെയ്ക്കാനായി ഗ്ലോറിയോസ ഒരു കഥ മെനയുന്നു, കുറ്റകൃത്യത്തിൽ പങ്കാളിയായ മോഡെസ്റ്റയെ ഒരു ടുട്ട്സി സംഘം ബലാത്സംഗം ചെയ്യാൻ ശ്രമിച്ചെന്നും, അവളുടെ ധൈര്യം അവരെ രക്ഷിച്ചു എന്നും കഥയുണ്ടാക്കി.ഇത് ഏവരുടെയും ശ്രദ്ധയും പ്രശംസയും നേടി. ടുട്സികൾക്കെതിരെ കാവൽ നിൽക്കാൻ ഒരു സൈനിക യൂണിറ്റ് കാമ്പസിനുള്ളിൽ നിലയുറപ്പിക്കുന്നു. ന്യൂനപക്ഷത്തിനെതിരായ ആക്രമണത്തിന് ആജ്ഞാപിക്കുമ്പോൾ ഗ്ലോറിയോസ പതുക്കെ തുറ്റ്സി വിരുദ്ധ മുഖം കാണിക്കുന്നു.
കോളനിവത്കൃത സമൂഹത്തിന്റെ സാംസ്കാരിക സംഘർഷങ്ങൾ ഗൗരവപൂർവ്വം ചിത്രീകരിച്ചിരിക്കുന്നു. ദൃശ്യപരമായി സമ്പന്നമായ ഈ ചിത്രം ലൊക്കേഷനുകളുടെ മനോഹരമായ ഭംഗി പകർത്തുന്നു. തികച്ചും സ്വാഭാവികവും സന്ദർഭോചിതവുമായി തോന്നുന്ന നർമ്മത്തിന്റെ നിറങ്ങളും സിനിമയിൽ നിറയുന്നുണ്ട്.
Comments
Post a Comment